Blog Pakpak

Jumat, 14 September 2012

Cerpen Pakpak : 7 TAHUN KUPEMA KATA KELLENGMI BAGENDARI ASA RUAP


Oleh : Wasdin S Berutu, SH - PAKPAK ADALAH PAKPAK

( Ni pesenget mendahi ke, muna i jaka ke cerita en, tahan taba nde cukup tercerm, tapi bagian-bagian tertentu mungkin merdeggar pendurungen ndene,  muna oda ke percaya yah jaka kene ...... )

Lot sada pasang simerbaju deket anak perana remaja pukpuk dak mersirisaken, mersirehen, sipata ngget bage simerubat. Daberu en gelarna CENUR BR BANUREA,daholi en gelarna BINDORAN BERUTU. Kalak en sidua sikola i SMA Negeri Sidikalang.

Muna si Bindoran anak kost ngen janah mermasak sendiri tapi muna si Cenur ia per Sidikalang ingo. Sapo bekas kost si Bindoran merkellang tellu sapo mi sapi si Cenur, isa terdok tiap ari ngo kalak pesimbak.


Kalak en mijehe-mijulu pasti perotor bage neneh manuk, muna dengan-dengan sada sikolana idokken ngo kalak en merhallet, padahal situhunna  kalak en oda merhallet malahen pukpuk dak mersirehen, mersirisaken sampe sipata mesiroi, tapi mersiroi pe murubat babah bagimo kaltu, oda sanga sampe takengkeng.

Kalak en duana enggo Kelas III janah segejab nai lulus mo kalak en, tapi muna i persikolan siswa pande kalak en sidua,  mulai Kelas I nai kalak en dak pegancih-gancih menjadi Juara I dkt Juara II Umum.



Sada ketika laus kalak en merdalani mejeng-ejeng naik kreta (speda motor) si Cenur cibbon-cibon keliling kota Sidikalang, muna merboncengen kalak en oda kalih bage kalak merhallet, si Cenur oda seggan ia memeluk abak si Bindoran kan podi nai, janah toko koccakna kalak en sidua. Nai singgah mo kalak en lokasi rekreasi favorit kalak en imo Tikungan S.

Cenur : idok kono pana pande ko, bagendari iteruhku ngo ko aku Juara I kono juara II.
Bindoran : Unang pella banggasu ko, Kelas II buari aku ngo pukpuk Juara I, Kelas III enpe sebenarna aku ngo juara I tapi masih etongenku ko jadi kubaing ko Juara I.
Cenur : Nidah mo nahan ise kita lulus mi Perguruan Tinggi Negeri, aku manang ko ?
Bindoran : Siapa takut .... tengenmo nahan kehebatan si Bindoran anak maholi en.
Cenur : Nang ale nang, merkacca ko lebbe, idok ko pana maholi ko, mbue daholi maholi ki perli (pdkt) aku ibetoh kongi, ibetoh ko karna kade ? karna si Cenur Mberru.
Jadi i pedessing-dessing si Bindoran mo perkundulna mendahi si Cenur.

Cenur : Bage i pedessing-dessing ko bangku idokko pana ngget aku mahan helletmu, rogi aku bamu, aku mberru ko meroha.
Bindoran : Sory ... ya Impal, muna daberru bage ko pitu daberu menjolmiti aku, toko mberu-mberuna, ndaoh lebih mberu dari ko, tapi karina kutolak, apalagi moko oda levellll...

Bagimo dak pukpuk kalak en mersilesengen, mersirehen, mersirisaken, oda ngget talu, padahal muna saat-saat kalak en berdua-duaan muna i nelneli si Bindoran si Cenur deket tatapan sendu dan penuh arti situhunna salah tingkah ngo si Cenur, mbukbuk pusuhna, bagi ma sebalikna muna i umbar si Cenur senyum manis dan senyum manjanya salah tingkah ngo si Bindoran janah mbukbak ma pusuhna.

Nangpe kalak en mersilesengen pukpuk tapi muna enggo kessa jam istirahat sikola pasti i tulusi si Cenur si Bindoran, manang sebalikna si Bindoran menulusi si Cenur, kalak en pasti rasken mi kantin, bagima laus sikola manang mulak sikola pasti kalak en perotor oda pernah merpisah nengpe tiap saat merubat babah.

Ibagsen sada minggu paling perteruh mo kaltu 2 kali pasti i rantangken si Cenur nakan deket ikan plus rorohna mi si Bindoran mboni-mboni, jadi rasken mangan mo kalak en i Kost si Bindoran.

Pernah sikali libur panjang, mulak mo si Bindoran mi kutana i Salak, si Cenur oda dak terpedem, karina kalak i kusoi dahari mulak si Bindoran. Oda pana tertahan si Cenur nteddohna laus ia mi Salak mendahi si Bindoran, tersengget si Bindoran.
Bindoran : Kasa kono roh mi Salak en, pasti ko ntedoh mendahi aku kan ?
Cenur : GR banget ini anak, aku misen oda mendahi ko Kulikap, aku merdalani naing meronan Salak.
Bindoran : Tah tuhu .... mbiar ko sendah aku mertandang isen ?
Cenur : Terserah ko Impal, ketimbang tukapkap ko isi bage kehkeh lodin dengani aku meronan, asa mahan paccal kita i sapo men, boi ngo kan ?
Bindoran : wah mantap ngi, i betoh ko Inangku  Calon Simatuamu kucul kalohon mangan paccal.
Cenur : Ise Calon Simatungku nina si Cenur tapi salah tingkah.

Laus mo kalak en meronan menokori bahan-bahan deket bumbu paccal  nen, janah mangan peccal mo kalak en rame-rame i sapo si Bindoran, bagimo teridah mesrana kalak en sidua.

Habis mangan kirana mo Inang si Bindoran :
Inang Bindoran :  Lolona aku Cenur muna kono purmaenku, tapi kamien dahko perkuta-kuta janah mpogos, tapi sada senget-sengetku bana ndene sidua dukak-dukakku, “ unang pernah i joloi ke perkawinan “, unang kucera-kucera, enget ke peddah mende, perpantangen i adatta Pakpak (maksudnya : unang melakukan hubungan terlarang sebelum pernikahan)
Cenur : Oda ngget namberu anak men mendahi aku, ia Maholi aku meroha, alani ngo Namberu harap tendi, kata poda lot si jemaken, peddah mende mi i begge tendi nami ngi Namberu.
Bagimo alus si Cenur  bage si menggirgir sorana, oda tahan ia menengen abe si Bindoran, menter permisi ia langsung laus mi kamar mandi.

Karna isingo merberngin si Cenur, bernginken ni iembah si Bindoran mo ia keliling soh mi Sindeka. Kundul-kundul mo kalak i Sindeka sambil menikmati hembusan semilir angin pegunangan Sindeka.
Bindoran : Menter i salam ia tangan si Cenur, mantap en deng pernah idokken kono aku Maholi, memang faktana aku Maholi kan ?
Cenur : eeee Bindoran sinturas, menjaga ukur Namberu ingo asa kudokken ko maholi, asa unang ianggap aku sombong padahal aslina merohaaaa nina sambil lojang.
Bindoran : bagingo keppe, kudok tuhu, akapenmu ngo kaduan pengrehen mi bangku, mudah-mudahen ko oda bage sikembalangen.
Cenur : Muna ko idokken ko aku meroha padahal mberru lot pana kade ningku Biahat,  lebih merasa kembalangen ko kaduan daripada aku, enget kata-kata ngki.
Sebenarna  kalak en sidua ruap bagi sambing ngo kessa kata-kata ni, oda pella i maknai kalak i kade lapaten kata sini ruapken ni, maklum masa remaja penuh dengan rasa gengsi.
Bagimo dak pukpuk kalak en mersilesengen, tapi saling menulusi, saling nteddoh, Cuma kalak en sidua oda ngo merhallet pellin merdengan-dengan bagi sambing.
Muna malam minggu nggati ngo roh  si Cenur mi Kost-Kostan si Bindoran, langsung gale-gale ngo si Cenur i tempat tidur si Bindoran.

Bindoran : eeee kehkeh ... unang kotor baing kono pedemenki, enggo mako meridi ndai ?
Cenur : ooo le Wangkah, oda bage ko enggo meroha, malas meridi, mungkin dunuten ngoko, bau melekkis
Bindoran : Muna ko isen malam minggu en, oda mo boi aku mermalam minggu deket halletku.
Cenur : Daberru mbalang-mbalang ngo kessa ngget bamu, merkacca ko lebbe asa i idah ko abemi bage kulikap.
Enggo kessa mbages berngin itaruhken si Bindoran mo si Cenur misapona, bagimo pukpuk, sipata si Bindoran roh misapo si Cenur sampe larut malam bage kalak si merhallet padahal oda lot hubungen perhalletn kalak en sidua.

Pernah sikali mersakit harun (demam) si Bindoran, cukirkir bergohen i kamar Kostna, bagimo kumelaputna si Cenur, laus ia mi apotik i tokori tambar demam, selama demam si Bindoran dua ari terus i jaga-jaga si Cenur. Sabar kalohon si Cenur i Kompres takal si Bindoran sipata i dapoli tangan deket nenehna, takuak-takuk manuk ia asa mulak mi sapona.
Bindoran : Ncio takalku, naing mate pana aku en.
Cenur : Pedemken mo segejab nai njuah ngoko impal, unang dak merkata mate mbiar aku kibegge, ngget ko rebbakken mate kita duana ? nina sambil i urut-urut takal nen.

Asa percaya ko, tengen dahko gale pa aku i sampingmen dok si Cenur sambil i pegale ia dagingna isamping si Bindoran,  janah i urut-urut takal si Bindoran, enggo kessa i idah si Cenur meddem si Bindoran, hanjar-hanjar ia keke kundul ia i meja belajar si Bindoran lako mengkarejoi PR si Cenur deket PR si Bindoran, bagimo setiana si Cenur nangpe kalak en pukpuk merubat janah oda merhallet.

Memang muna Bapa deket Inang si Cenur selloh ngo ukurna mi si Bindoran alana si Bindoran sopan kalon kiranai janah ngkasah, nggati ngo engket si Bindoran menggogo kopi si Cenur janah muna mulak i juma nai pasti merembah sebban ngo baen, oda ngo tujuan si Bindoran lako muat ate bapa si Cenur manang memuat ukur si Cenur tapi memang dasar si Bindoran jelma ngkasah, sifatna suka menolong kalak. Ingo asa mulak takuak manuk pe si Cenur kan sapo kost si Bindoran nai, kumara i betoh bapana merskit harun si Bindoran oda nggerrah ate bapana.

Tapi gitik ngo ate enggo kessa kalak en mersiroi, pernah sikali kaltu kundul si Bindoran i kantin deket daberu lain, perkundul kalak en rapat maklum lagi menengen foto, wah si Cenur mbara katingna, salah tingkah, dengan terpaksa kundul si Cenur i bangku kantin agak ndaoh, roh si daberru sini gembar si Bindoran mendok, “ Itu pacar kamu datang, ntar dia cemburu “ nina. Si Bindoran menter mendahi si Cenur.

Bindoran : kasa ko sip-sip impal, kade merulah ....
Cenur : oda ialoi, sip ia campur mbara katingna.
Bindoran : Cemburu ko pana aku njolmit-njolmit deket turang i tih, maklum anak maholi ?
Cenur : eeee siapa cemburu, emangnya kita hubungan apa rupanya ?
Bindoran : ingo tih, kita kompak, karina kalak mendok kita merhallet padahal nyatanya kita oda lot hubungan, kasihan deh Gw.
Cenur : salah sendiri, pema pembalesenku impalku......

Tuhu kaltu, barembenkenna lako sikola biasana kalak en perotor, tapi sikalien si Cenur merdalan mesra deket daholi sideban janah pas ijolo-jolo si Bindoran. Sambil i jemak si Cenur tangan daholi en, hiiii Bindoran .... impal hanjar-hanjar ko merdalan i unang tertuktuk neneh mi, awas sihiren, penengen mi pe unang meol-eol sihiren nahan deket matami, nina bage pegara-garaken, Sip si Bindoran tapi abe si Bindoran enggo mbara bage abe kalak cidudu siceggen.
Sebenarna Si Bindoran diam-diam sangat cinta dan sayang ngo mi si Cenur, bagima sebalikna si Cenur  cinta janah sayang mendahi si Bindoran, alani ngo piga pe kalak melamar si Cenur selalu i tolak ia karna daholi i ukurna pelin si Bindoran. Tapi kumara saling gengsi, pukpuk mer sirisaken jadi oda lot waktu ne mendokken cinta satu sama lain.

Saminggu nai asa Ujian Terakhir kelulusan, terasa mo iakap kalak en sidua, laus kalak en mi tempatna biasa kundul-kundul i Tikungan S. Sikalien beda kaltu, baik si Bindoran manangpe si Cenur sipsip janah mersitengenen, dua-duana membisu seribu bahasa, teridah sedih abe si Cenur bagima si Bindoran, oda lot kade kata ruap bana kalak en nai, mungkin karna naing tamat mo pana kalak en si dua janah oda nenge nahan lot denganna perotor, dengan mersilesengen, dengan curhat, dengan merdalani. Sampe mulak kalak en sidua sengkebabah poda lot keluar kata-kata kalak en.
Tamat mo kalak en sidua kan SMA nai tong oda lot kata Cinta satu sama lain, terakhir rohmo si Bindoran mi sapo si Cenur, detik-detik terakhir pertemuan kalak sangat mengharukan kaltu oda ne mersirehen, tapi sip-sip kalak en bage si termenung dua-duana, pellin mersinelnellen mo kessa sambil sikali-kali teridah ndabuh eluh si Cenur oda ia sadar, mungkin kalak en oda ngget berpisah.

Bindoran : Sigejab nai kita merpisah, mungkin oda ne pesimbak, tuhu kata mi pasti aku bage sikembalangen oda ne rebbak dekket ko Cenur.
Cenur : Lebih-lebih aku terasa bage mersindagel kuakap, oda kubettoh tah tahan nahan aku oda pesimbak dekket ko, oda ne boi kubayangken bakune nahan pemikirenku. (sambil i lap ia eluhna)
Bindoran : Sekirana boi waktu i kuputar kembali, mungkin hubungan en oda kubaing hampa, akan ku ungkapkan kata-kata cinta terhadap seorang wanita yang selama ini kupuja dan kudambakan,  akan ku isi masa-masa SMA en dengan catatan cinta penuh romantika, begitu bodohnya aku harus perpegangan pada rasa gengsi dan mengorbankan gejolak cinta yang ada di relung hatiku ?

Cenur : Oda kubetoh tah kade bentuk hubungan ta en impal, aku sangat menyesal, kasih sayang, cinta asmara dari orang yang kupuja-puja selama ini tak pernah kudapat, nina janah tangis mertuhu-tuhu ia.

Mersisalamen mo kalak en sidua, oda sadar si Bindoran i peluk mo si Cenur, janah i cium keningna, si Cenur tangis tereluh, ketika naing i lepasken si Bindoran pelukan nen, roh si Cenur mendok “ peluklah aku agal lama Impal “ agar masa indah ini tetap kita kenang untuk selamanya. Bagimo momen-momen mengharukan perpisahen kalak en sidua janah enmo terakhir kalak en pesimbak.
Tellu tahun kalak en merdengan i deng ngo pernah i peluk janah i cium si Bindoran kening si Cenur, maklum moke kalak en pada dasarna oda ngo merhallet.

Si Bindoran melanjutken kuliah mo ia i Fak Ekonomi UGM Jogja, sedangken si Cenur masuk ma mi Fak Ekonomi UI di Jakarta. Selama kalak en kuliah putus komunikasi, tapi baik si Bindoran lot pe Halletna hanya setengah hati ukurna tong bana si Cenur bagima si Cenur lot pe halletna tapi ukurna tong mendahi si Bindoran, sangkin cinta kalak en sidua i dompet si Cenur terpampang gambar si Bindoran, bagimape i dompet si Bindoran terpampang gambar si Cenur.
Kalak en si dua mersibetohen ngo dua-duana kuliah, i bettoh si Bindoran ngo si Cenur kuliah di UI janah si Cenur pe ibettoh ngo si Bindoran kuliah  di UGM, tapi selama kuliah oda pernah kalak en berkomunikasi, oda ma lot niat lako kitulusi satu sama lain, dua-duana fokus ngo kalak en mi perkuliahenna.

Nggati ngo menghayal si Bindoran mi si Cenur, bakune ndia kabar si Cenur, wah 4 tahun tikanni bagen bentukna katena sambil i tengen foto si Cenur, bagendari enggo ndia bakune bentuk na, sedang tikkan ni mberru apalagi bagendari kuliah pasti tambah mberru bagimo i angan-anganna sambil tercerm sendiri bage jelma si sasek.
Tapi muna si Bindoran menghayalken si Cenur tambah mberru, ibayangken ia mo si Cenur merhallet dekket daholi dengan sada kuliahna, wah dengan seketika berubah cemerut abe si Bindoran nangpe en hanya hayalenna. Ahhhh man kade pikirinken i, ia oda ngo halletku kate si Bindoran.

Bagima kaltu si Cenur, enggo empat tahun, bakune ndia si Bindoran ? kinpe maholi apalagi bagendari kuliah pasti tambah gagah, pernah mango ndia ienget si Bindoran Sinturas i aku ? bakune ndia bentuk perdagingenna bagendari, pasti enggo berubah i muna pesimbak pe kami pasti oda kutandai ne i, bagima bayengnna sambil tercerm mengnelnelli poto si Bindoran.

Tapi enggo kessa ibayangken, si Bindoran tambah gagah apalagi wajahna i hiasi deket  kumis ni pasti lebih jantan mampu memikat daberru bagak-bagak  i Kampusna, mungkin merhallet serius ia mi beru Sunda, nang ale nang kate si Cenur langsung cerngut abena bage rimo mungkur. Eh ngapain juga gue pikirin dia, emang dia itu pacar gue, bagimo angan-anganna bage si cemburu.

Sohmo tikkina si Bindoran naing menyusun Skripsi, i pilih ia mo tempat riset manang penilitianna Kota Salak Pakpak Bharat sesuai judul deket materi Sikripsina, hitung-hitung boi mulak mikuta kate si Bindoran.
 Bagima si Cenur enggo menyusun Skripsi, jadi ipilih ia ma daerah tempat peneliatan Sikripsina i Kota  Salak Pakpak Bharat, tekka nahan boi pesimbak dekket Namberu Omak si Bindoran, mahan paccal bage si tikanni katena ma.

Sada faktor kebetulan, hari deket jam keberangkatan kalak en dos kaltu, jadi i  bandara Sukarno Hatta kalak en sidua pesimbaktapi oda ne mersitandean penampilan udah serba kota baik Bindoran terlihat tambah gagah bagima si Cenur nidok bintang film kaltu.
Jadi selesai kalak en chek in tiket deket bagasina enggo masuk, pas kalak en rasken meningkah excalator lako mi lantai II Bandara menuju ruang tunggu.
Kalak en sidua dak mersitengenen, sipata curi-curi pandang muna pesimbak mata  saling tercerm, perasaan kalak en sidua jadi lain, mungkin saling samar-samar menandai tapi duana masih sangsi.

Akibat penasaran roh Bindoran i petandakan dirina,, i petandaken si Bindoran dirina deket gerar sideban Andi nina, si Cenur pe bagi ma idokken  gerarna  Cindy.


Bindoran : apakah anda keberatan jika saya ajak minum di sana sebelum pesawat berangkat ?
Cenur : Dengan senang hati

Laus mo kalak en mi ruang makan Bandara, anehna semakin kalak en mersitengenen lot terasa bage si bukbak pusuh kalak en, dua-duana bage merangan-angan  dan bertanya, mungkin ngo ndia en ?


Bindoran : Nada suara anda mengingatkan saya pada seseorang
Cenur : Saya juga, nada suara anda mengingatkan saya pada seseorang ;

Mungkin penampilan bisa berubah kaltu tapi nada suara,  gaya berbicara oda berubah, tambah kumasebut perasaan kalak en sidua

 Bindoran : mungkin ngo ndia en si Cenur ?
Cenur, mungkin ngo ndia en si Bindoran ?

Si Bindoran mencari akal, kubuka lebbe dompet ken muna ia ngen pasti tersengget katena, bagima si Cenur, muna kubuka dompetken muna si Bindoran ngen pasti tersengget katena ma.
 Sengaja mo pura-pura si Bindoran ki buka dompetna, bagima si Cenur membuka dompetna dengan alasan lako membayar pesanan makanan deket  menumen sinipesan kalak en, teridah mo i dompet si Bindoran gambar si Cenur, teridah ma i dompet si Cenur gambar si Bindoran.

Dua-duana rasken mengelari bage si lolo

Bindoran ...... Cenurrrr ..............

Oda sadar berpeluken (sulit menterjemahken)  mo kalak sidua melapaskan rindu yang terpendam sidekah nenda, habis i tempuki si Cenur Gurung si Bindoran, ‘ ntedoh aku bamu” dok Cenur, “ aku pe ntedoh bamu” dok Bindoran, sampe-sampe Kasir Perlapo Bandara i tendo, janah tercerm mungkin engket i bahagia mengidah sepasang manusia yang berbahagia en.

Bindoran : Kuliah i UI kan ?
Cenur : Kuliah i UGM kan ?


Bindoran : naing mike ko Impal ?
Cenur : Naing riset sikripsingku mi Pakpak Bharat, kono naing mike Mpal ?
Bindoran : Aku pe naing riset sikripsingku mi Pakpak Bharat.

Ndekkah kalak en mersitengenen, mersi nelnellen, dua-duana tercerm, dua-duana sip-sip sampe menumen deket makanan sini pesan nen oda ne isarihken, mungkin terenget kalak en masa-masa SMA, tapi kalak en sadar bahwa antara kalak i tidak ada ikatan cinta manang ikatan perhalletn.

Enggo kessa kalak en ndekkah sip mulai mo mengranai tapi oda mersilesengen ne bage tikanni, kata-kata kalak en enggo saling menjaga perasaan janah teridah muna kirana kalak en enggo intelek.

Bindoran : Maaf Impal, boi aku mengkuso cituk tapi agak prinsip mungkin menggangu privasimu.
Cenur : Silahken Impal menjawab dengan senang hati.

Bindoran : kalak kade halletmu ?
Cenur : kasa jolon i kuso ko, naing ingo ndai kuso-kusongku ma bamu, kono kalak kade halletmu ?

Bindoran : Sidekah nen memang aku pernah merdengan mi piga-piga kalak daberu, tapi sada poda boi aku serius ?
Cenur : Kasa oda boi serius ?

Bindoran : mungkin aku i bayang-bayangi masa silam, masa SMA tikanni, waktu i aku mengagumi sada daberru, tapi aku oda berani  mengruapken kata cinta bana sampe aku tammat SMA, aku sangat menyesal, kono ise halletmu Impal ?
Cenur : Mungkin kita dos, piga-piga daholi denganku oda kuakap lot sebanding deket denganku masa SMA tikanni, aku mengagumi daholi i tapi oda pernah ruap kata cinta bana nai, oda mungkin aku jolon mendokken kata cinta sedangken aku daberru, waktu i abengku tercerm tapi ukurku tangis, ise mo pana daberru kelleng ate mi itikki masa SMA impal ?
Bindoran : Sada daberu mberu kalohon, persabar, pande, nggati menaruhken nakan mi kost-kost ku, pernah menjadi susterku waktu aku mersakit demam, nggati kuajak kundul-kundul i Tikungan S.
Cenur : Ndor bagahken gelarna (pura-pura si Cenur asa mendapet kepastian)
Bindoran : Cenur br Banurea si kundul i jolo-jolongken.
Cenur : Gombal .... arnia nai pelin bagi  oda lot kata si cekepen ?

Menter i tarik si Bindoran mo tangan si Cenur janah i salam ia.

BINDORAN : CENUR ... !!!!  ODA BOI KULUAPI PERASAANKU, MULAI KITA MERSITANDAN KONO NGO KESSA DABERRU I UKURKU, ISE PE DABERU I ODA DOS BAGE KO, ODA BOI KISAINGI KO, JUJUR AKU IMPAL TIKANNI NAI SOH  BAGENDARI  NGKELLENG ATENGKU BAMU, BAGENDARI AKU MENGLAMAR KO MENJADI HALLETKU, MENJADI PURMAEN INANGKU.

CENUR : BINDORAN ... !!!! 7 TAHUN AKU IMPAL KIPEMA KATA NGKELLENGMI BAGENDARI ASA RUAP, KONGO KESSA DAHOLI SIBOI MENGISI UKURKU, KONGO KESSA NGKELLENG ATENGKU, KUJALO LAMAREN MI IMPAL, SENANG UKURKU JADI PURMAEN NAMBERU JANAH SENANG UKUR BAPA DEKET INANG MUNA KONO JADI KELANA.

Oda sadar nenge kalak en kaltu langsung pekerpi mersisanggohen pesohken kelleng ukurna, seolah-olah pelukan kalak en unang nemmu leppas ne .... soh mi sidekah-nidekahna.

Enggo kessa i lepasken si Bindoran Pelukan nen, menter i cium si Bindoran kening si Cenur sembil mendok ‘ I LOVE YOU “

Cenur : Kade terjemahen ni I Love en impal ?
Bindoran : Terjemahken sendiri mo isi Impal  bakune asa senang ukurmua nina  sambil mengkalbih kurum si Cenur manja.


Cenur : Oda pana mela ko ki emma aku  janah mengkalbih kurumku mbue jelma isen ????
Bindoran : Kupikirkankah .... emang gw pikirin, anggap sambing portibien kita sidua sidasa kalak en karina kost

Cenur : Apalagi Impal, enggo jumpa deket halletku, calon Bapa dukakku, kupikirkan kah ......

Langsung si Cenur menggandeng tangan Bindoran dengan mesra, sampe karina jelma si lot isi cemburu menengen kemesraan dua putra-putri Pakpak calon Sarjana Ekonomi en.


Tamat

Karya : Wasdin Sudiarma Berutu, SH
Tempat Tinggal : Kota Tarakan Kalimantan Timur
Kuta asal : Singgabur Pakpak Bharat.

Catatan :
  1. Cerita ini adalah fiktif, jika ada kesesuaian nama, tempat dan kejadian itu hanya faktor kebetulan.
  2. Cerita ini digambarkan bagaimana jiwa kalak Pakpak yang penyabar, mempunyai prinsip dimana akan menjatuhkan pilihan pada orang yang benar-benar patut dan layak untuk dipilih, melakukan hubungan cinta dengan memperhatiakan etika dan kesantunan, tanpa harus melanggar batas-batas norma susila yang baik dan adat-istiadat Pakpak, mengutamakan kuliah (pendidikan) daripada perhalletn.
  3. Jika ada media cetak yang berkehendak menerbitkannya harus seijin Penulis (Pengarang)

Tidak ada komentar:

Posting Komentar

Komentar anda :